معلومة مهمة

السلام عليكم
بداية أنا سعيد بوجودي في العيادة وإن كنت لسة معملتليش سبوبة حلوة بس ما علينا مفيش حلاوة من غير نار.....!!
في معلومة اتقالت حبيت أأكد عليها عشان مهمة لينا بشكل عام مش بس في الاسنان
بعد أي عملية زي عملية الخلع الجراحي بيحصل تورم لمكان العملية...!!
الحكاية دي بتحصل برضه مع أي خبطة شديده بتورم مكانها ...!!
اللي بيحصل هو عبارة عن التهاب في مكان الجراحة أو الخبطة دي بيأدي لحدوث اتساع في الأوردة مكان الالتهاب وبالتالي يحصل الرشح اللي بيسبب التورم مكان العملية أو الخبطة
المهم القصد من القصة دي إن المفروض لما نعمل عملية أو نتخبط نحط سريعا بعد العمليه أو الخبطة ثلج مكانها وده بس فيوم العملية
بعد كده هنبدأ نعمل كمدات ماء ساخن
الثلج بعد العملية مباشرة هيقلل الرشح من الاورده وبالتالي هيقلل التورم
والماء الساخن بعد كده هيساعد على امتصاص الرشح اللي اتكون فعلا وبالتالي هينزل التورم
بس كده
صدعتو ولا لسه...................!!!!!!!!!!!!
وكل سنة وانتو طيبين

ضاكتور جديد في العيادة .. ياقهلا ياقهلا

قشطة

البلية لعبت يا رجالة والعيادة اشتغلت

مش بس عالعايانين

لا دي جابت دكاترة كمان

وشكلي هقلبها مستوصف قريب

D:

....

إنه ليسعدني ويشرفني

إنضمام د.مالك لفريق المدونة

وإن شاء الله انضمامه يكون فيه إفادة ليكم وليا

بما إنه أكبر مني وأكثر مني خبرة

وأنا حبيت أكتب البوست دا ترحيبا بيه وشكرا ليه

لأنه شرفني بالانضمام دا فعلا

يلا رحبوا بقى ..

وادعوله ربنا يتم له السنة دي على خير

...

منــور يا دكترة

D:

دكتورة سنان ولسه بتسنن !!

كان يا ماكان

يا سعد يا إكرام

ولايحلى الكلام إلا بذكر النبي

عليه الصلاة والسلام

...

كان في بنوتة .. مش صغنتوتة

هي كبيرة بصراحة

كبيرة اوي

يعني بتاع 20 21 22 سنة كدا

D:

البنت دي حصلها إيه

بؤها وجعها

يانهااااااااااااااار

وبعدين

راحت للدكتور

وبعدين

لقاها .. لسه بتسنن

o-:

بتسنن ايه دي دلوقتي

طلع اللي ما يتسمى ومدوخ الناس كلها .. ضرس العقل

ايه هو بقى ضرس العقل دا .... صلوا بينا عالنبي

عليه الصلاة والسلام

----

ليه اسمه ضرس العقل ؟!!

لأن موعد خروجه من 18- 25 سنة في سن النضج واكتمال العقل

طب وللي مش بيطلعلهم ... مجانين ؟!!

لااااااااا مش هنخبط في الحلل

أمال ؟؟

في كذا سبب منهم :

1- اختفاء البرعم الخاص به من البداية
يعني الجزء الموجود في الطفل عشان يعمل ضرس العقل بعد كدا لما يكبر مشموجود أصلا

2- صغر حجم الفك بحيث لا يسمح المكان المتبقي بعد خروج بقية الأسنان بخروج ضرس العقل وظهوره

3- نمو ضرس العقل بشكل عرضي أو مائل فلا تسمح الأضراس المجاورة بخروجه

طيب إيه المشاكل اللي بيسببها ضرس العقل بسبب وجوده في الوضع دا

1- يحدث التهاب شديد في اللثة عند محاولة الضرس الخروج وربما تكونت تحت هذا الالتهاب بعض الإفرازات الصديدية التي تزيد من حدة الألم .

2- نتيجة لضغط الضرس على أعصاب الفك السفلي فإنه يصبح بؤرة ألم بين الحين والآخر .

3- قد تتسبب آلام ضرس العقل في عدم استطاعة المريض فتح الفم وإغلاقه بسهولة وربما عدم استطاعة بلع الطعام وارتفاع درجة الحرارة والشعر بالإعياء الشديد .

4- قد تصل الآلام أيضا إلى الأذن والعين وأسنان الفك الأخرى والرقبة لوجود الضرس في مكان عميق بالرأس.

5- عند خروج الضرس بشكل مائل فإنه يتسبب في تجمع فضلات الطعام بينه وبين الضرس المجاور متسببا في تسوس الضرسين .

6- نتيجة لضغط الضرس الكبير على الأنسجة فإنه يسبب أيضا حدوث انتفاخات وتورم في المنطقة المحيطة به.

ساعة حصول المشاكل دي أو بعضها لااااااااااازمن وحتمن ولابد تروح للدكتور عشان يشوفلنا حل

والحل عادة بيبقى استئصال الضرس بطريقتين ...

إما الخلع عادي

أو الجراحة وفتح اللثة واستخراج الضرس ودا بيحدده الطبيب على حسب حالة المريض ووضع الضرس
بعد عمل أشعة يحدد بيها وضع الضرس ودرجة ميله وعدد الجذور ودرجة انحناءها وطولها.

في حالة الخلع بتحدث مضاعفات بعد الخلع هي

1- حدوث انتفاخ وتورم نتيجة تعرض الأنسجة للضغط أثناء عملية الخلع

2- آلام ما بعد الخلع واليت تمتد إلى الرأس والرقبة .

3- حصول التهاب نتيجة لتعرض منطقة الخلع للبكتيريا التي تسبب حدوث هذا الالتهاب

4- عدم تخثر الدم بشكل صحيح نتيجة لجفاف هذه المنطقة عند بعض الأشخاص مما يؤدي لحدوث آلام شديدة على شكل صدمات كهربائية.

طيب انت كنت بتموت أساسا من التعب جيت خلعته عشان ترتاح يقوم يحصل دا كله!!
يبقى ما عملناش حاجة

أقوم أنا بئى آجي وأقول لجنابك لازم تتابع مع الطبيب بعد الخلع وتاخد العلاج المناسب للمضاعفات اللي ممكن تحصلك عشان متحصلش مشاكل

والعلاج بيكون

1- الانتفاخ : عمل كمادات باردة بشكل دوري مع تناول الدواء المناسب.

2- الآلام : تناول المسكنات المناسبة حسب وصف الطبيب سواء أقراص أو إبر.

3- الالتهابات : تناول المضاد الحيوي المناسب لنوع الالتهاب

4- عدم تخثر الدم بشكل صحيح : الذهاب الى طبيب الأسنان الذي يقوم بتجريف المنطقة الجافة لإيجاد بعض الرطوبة فيها مع وضع عشبة تساعد على تخثر الدم بشكل طبيعي.

كدا تقريبا قلت كل الحاجات اللي ممكن تهمكم عن ضرس العقل والمشاكل الخاصة بيه
أتمنى تكووون أفادتكم

دمتم بعقل وصحة وعافية

و

سلام

الأسنان ... مية من تحت تبن D:

أيوووووووون أنا دكتورة سنان وعارفاها الأسنان دي مية من تحت تبن وبسببها الجسم بتحصله بلاوي والواحد فينا ولا هو هنا

وفاكر ان السبب حاجة تانية او مش واخد باله أصلا.

طبعا عاوزين دليل وكلام علمي موثق وبتقولو .... ايييييييييييييه الحكااااااية؟!!!!!!!



أنا هقولكم إيه الحكاية



صلو عالنبي



عليه الصلااااااة والسلام



**********



الفترة الماضية تأخرت كثيرا في ادراج تدوينة جديدة ولكن السبب أنني انتظرت اجابات التاجات لأبدأ بالحديث عن استفساراتكم

وبعدما جمعت الاستفسارات منها آثرت أن أبدأ بما هو أكثر عموما وشمولا ثم التدرج حتى الأكثر تخصصا والأكثر دسامة



وبالتالي فقد قررت ان أبدأ اليوم بالاستفسار عن ...



صحة الأسنان وعلاقتها بالصحة والحالة العامة للجسم



وفي هذا الكثير والكثير جئتكم منه بما قل ودل .. سائلة الله عز وجل أن ينعكم عليكم بالإفادة وعلينا بالثواب



**********



هناك الكثير من الأمراض والتي لها علاقة وثيقة بأمراض الأسنان وتكون هذه العلاقة غالبا عكسية

بمعنى أن تؤثر الاصباة بمرض ما على صحة الاسنان أو تؤثر أمراض الاسنان على صحة الجسد مسببة هذا المرض

وفيما يلي نبذات مختصرة عن بعض هذه الأمراض



**********



(1)

مرض السكر



وهو المرض الأكثر شهرة ويعد من أمراض العصر وأكثر الأمراض غزوا للأجساد

كما أن العلاقة بينه وبين أمراض الأسنان علاقة معروفة لحد كبير أيضا.

حتى وقت قريب كان يُعتقد بأن مرض السكر يؤثر على صحة الأسنان واللثة وفقط ... وهذا صحيح

فهو يضعف من ثبات الأسنان في أماكنها داخل عظام الفك مؤديا إلى سهولة كسرها وتساقطها كما يسبب التهابات اللثة المؤلمة والمصاحبة بنزيف في كثير من الأحيان أثناء استخدام الفرشاة وخيط التنظيف وغيرها ، كما تزيد هذه الالتهابات من حساسية اللثة تجاه المشروبات الباردة والساخنة.

والجديد هذه الأيام دراسات أثبتت أن أمراض الأسنان وأمراض اللثة بشكل خاص قد تتسبب في الإصابة بمرض السكر!!!!

وذلك عن طريق خلل في جهاز المناعة يسمى Auto Immune Diseaese أو مرض المناعة الذاتية.

فعند إصابة الشخص بمرض في اللثة تسبب الالتهابات والنزيف دخول الكثير من البكتيريا إلى الدورة الدموية منتشرة في كل أنحاء الجسم وعند قيام جهاز المناعة بمحاربة هذه البكتيريا قد يحارب بعض خلايا الجسم خطأ معتبرا إياها أجساما غريبة ، وتتضمن خلايا الجسم التي يهاجمها خلايا البنكرياس الخاصة بإفراز الأنسولين وبالتالي التسبب في مرض السكر.





(2)

أمراض القلب



من العجيب أن يكون لأمراض الأسنان تأثير على القلب يؤدي إلى الوفاة أحيانا.

وقد انتبه الأطباء في السابق إلى وجود علاقة بين تساقط الأسنان والاصابة بأمراض شرايين القلب وحدوث الوفاة

لكن مؤخرا أجريت دراسات تأكيدية على فئات الشباب اليافع حتى يتم تأكيد العلاقة بين تساقط الاسنان وأمراض القلب بوضوح دون أخذ الحالة العمرية المتأخرة في الاعتبار كما في السابق

وقد أكدت هذه الدراسات على وجود علاقة وثيقة جدا بين تساقط الأسنان و الاصابة بامراض شرايين القلب

فالدراسات التي أجريت على البعض أكدت أن تساقط 9 أسنان فما فوق قد يرفع نسبة الوفاة بنسبة 35%

ومع استبعاد المدخنين لما للتدخين من اثر على أمراض القلب والتسبب بالوفاة فقد كانت النسب كالتالي

من 5:1 أسنان متساقطة ... نسبة الوفاة 7%

من 30:6 ..... 10%

كل الاسنان ..... 12%

والسبب في الإصابة بأمراض القلب يرجع إلى النواتج الكيميائية والمواد المفرزة من البكتيريا التي تغزو الجسم عن طريق االتهابات اللثة والتي تصل إلى القلب مصيبة جدران الشرايين الدموية.





(3)

أمراض أخرى



تعد أمراض أخرى ذات علاقة وثيقة بصحة الأسنان منها التهاب الكبد الوبائي والآثار الجانبية لبعض حالات الحمل

كما أن الكثير من الأمراض الجلدية والدموية تظهر أعراضها في الفم

أيضا تشير التهابات اللثة وتقلقل الأنسان ، شدة النزيف بعد الخلع ، الاورام ، البثوروالالتهابات بعظام الفك تشير هذه كلها إلى أمراض أخرى خفية في الجسم .

على الجانب الآخر فإن أمراض الأسنان نفسها قد تؤثر في حدوث أو زيادة حدة بعض الأمراض وتبطء سرعة التعافي منها مثال

الروماتيزن ، أمراض العيون ، السكر وأمراض القلب

كما قد تنعكس الام ضرس العقل على الأذن ويظن الشخص أنه مصاب بمرض في الأذن غير أن الحقيقة أن المرض بضرس العقل.



(4)

التغذية



تؤثر التغذية بشكل كبير على صحة الأسنان وبالعكس قد تؤثر امراض الأسنان وبعض الامراض الاخرى على قابلية الشخص للأكل وبالتالي على حالته الغذائية مما يزيد من حدة أمراض الاسنان نفسها ويؤخر معدل التعافي منها.



**********



كانت هذه نقاط من فيض من المعلومات في هذا الجانب



أتمنى أن تكون أفادتكم وأجابت عن استفساراتكم المتعلقة بهذا الموضوع



وأحب أن أختم بمعلومة طريفة تقول



أن الإنسان هو المخلوق الوحيد الذي يمكنه أن يعيش بعد فقده لأسنانه



:)



فلنحمد الله على نعمته



ونشكره عليها ونؤدي أمانتها ونراعيها



سلمتم من كل سوء

تــــــــــاج مسووووس

كما تجري العادة دوما لحل أي مشكلة
تُجرى استطلاعات رأي واستبيانات لرصد أفكار المجتمع عنها

وقد آثرت أن أتخذ هذا المنهج هنا
ولكن على الطريقة التدوينية

وبالتالي أحببت أن تكون أول تدوينة على صيغة (تاج) يمرر بين المدونين لأصل إلى أكبر قدر ممكن من الأفكار والأراء عن طب الأسنان وطبيب الأسنان ...

إذن إليكم هذا التاج ..

(1)
عارفة إن السؤال دا إجاباته كلها هتبقى شتايم بس مش مشكلة ما باليد حيلة
السؤال هو ..
هل تحب طبيب الأسنان ؟!! ولماذا ؟!!


(2)
متى كانت آخر مرة زرت فيها طبيب أسنان؟!


(3)
هل لديك طبيب أسنان ثابت أم تذهب إلى أي طبيب حسب الحاجة ؟!


(4)
هل أنت مؤمن بأن المتابعة والكشف الدوري عند طبيب الأسنان أمر ضروري؟! ولماذا؟!


(5)
عندما تذهب إلى طبيب أسنان لتلقي العلاج هل يفيدك الطبيب بمعلومات تكفيك عما تعاني منه ؟! وهل ترغب في الحصول على هذه المعلومات أصلا أم أن الأمر لا يهم ما دام سيعالجك ؟!!


(6)
يعتقد الكثيرون بأن طبيبة الأسنان أقل مهارة من طبيب الأسنان فما هو رأيك؟!! وما السبب ؟!!


(7)
إذا كنت والدا أو كنتِ أمّاً هل تهتمـ / ـين بإعطاء طفلك ثقافة جيدة عن الاعتناء بأسنانه ؟!!


(8)
كم مرة تقومـ / ـين بغسل أسنانك ؟!!


(9)
ما هي علاقتك بالسواك ؟؟!!


(10)
حسب معلوماتك .. ماهي المواد الطبيعية والأغذية التي يمكن أن تكون مفيدة للأسنان ؟!!


(11)
هل تعتقد حقا أن أطباء الأسنان (نصابون) ؟!!


(12)
ما هي أكثر صفة تود أن تكون لدى طبيب الأسنان ؟!!


(13)
عندما يقوم الطبيب بإجراء علاج معين ثم يطلب منك الذهاب إلى البيت والعودة بعد مدة هل تعود؟!! ولماذا؟!!


(14)
أيهما أفضل بالنسبة لك .. الخلع .. أم العلاج وإن كان طويلا مؤلما ؟!!


(15)
أجريت دراسات أثبتت أن نسبة كبيرة من شعور مرضى الأسنان بالألم هو إيحاء نفسي. إلى أي مدى تتفق مع هذه الدراسة ؟!!


(16)
أكتب / ـي النقاط والتساؤلات والأمور الغامضة بالنسبة لك حول طب الأسنان وطبيب الأسنان و التي تود لو طُرحت على مدونة I'm a Dentist .


(17)
أمرر هذا التاج لـ ....

استعنا عالشقا بالله

بسم الله

وطني

عصفور المدينة

دكتور حر

صاحب المضيفة

إمام الجيل

عبد الرحمن ياسين

أوراق الورد

آخر العنقود

عايز أتعلم

همسة قلم

سمية بنت البنا

نارا

نور جديد

فزلوكة

رئيسة حزب الأحلام

قلب أبيض

معاذ فتحي .. فارس الأزهر

محمد الشاعر

أحمد سعيد بسيوني

ميخا

فكك مني

حسام يحيى

بنت خيخة وأي كلام

آبي

اللؤلؤة المكنونة

البلد بلدنا

ونووووور - ظل قلم

(مسك الختام) ;)

كفاية كدا عشان تلاقو حد تمرروله

D:

يوم الافتتاح..

علقوا الكهارب والزينات



ووزعوا الحاجة الساقعة والحلويات



جهاد بقى عندها عيادة يا رجالة



يامنتا كرييييييم ياااااااااارب



انا مش عارفة الدكاترة بتوع الاسنان دول بيشقوا ويتعبوا ويجمعوا فلوووس عشان يعملوا عيادات طويلة عريضة



وفي الاخر يقولك دا جزاااااااار



دا بميفهمش اساسا



دا عمل دا خلا دا سوا



طب وماااااااله العلاج عن بعد



عالاقل انا لو حصل حاجة



يبقى في دليل اني مجتش جنب بؤ حد



D:



هو طببببعا طبببببببعا



لا هيبقى علاج ولا يحزنون



ولا حتى استشارات محدش يطمع



>>>> امال فاتحاها تحنيس يعني



أيوووووووون



حاجة زي كدا



لا هو بصراحة شايفين الجملة اللي فوق في البنر دي



أيون



تعالى وتعرف عليها أكثر



باذن الله هحاول على قد ماقدر



بمساعدة أخوتي في طب الاسنان وبمساعدتكم أكيد



إننا نقرب المسافات شوية بينا وبينكم



والله بجد انا بحس بعداء تجاه طبيب الاسنان



هههههههههههههههه



اما بسبب الالم او بسبب الفلوس



وياسلاام لو الاتنين



S:



مع ان واللللللللللللله



احنا غلاااااااااااابة وطيبيييييييييييين وحلوييييييييييين



حتى بصوا



D:



إن شاء الله هنتكلم في مواضيع كتير وهنفتح نقاشات كتير وربنا يسهل ونفتح باب للاستشارات مفيش مشاااكل عاااااادي



البوست دا افتتاح العيادة يعني الدخول مجانا من غير كشف



بس اللي مش هيبارك ويقول اقتراح للمدونة



مش هيخرج بسنانة سليمة



أنا بقول اهو



مااااااااااشي؟؟؟



ماشي اتفقنا


شرفتوا ونورتوا العيادة

قصصدي المدونة



يلا اسيبكم بقى عشان في مريض مستنيني



D:



السلام عليكم